Educación

Este eixe aborda os diálogos, cruzamentos e transferencias entre o ámbito educativo, formal e non formal, a cultura e as artes como garantía para o pleno exercicio dos dereitos culturais ao longo de toda a vida.

Dous grandes consensos internacionais estableceron o marco para as novas políticas culturais que, dende unha perspectiva de dereitos fundamentais, deben establecer de forma clara o vínculo coas políticas educativas. En primeiro lugar, a declaración resultante do encontro mundial sobre políticas culturais en México (MONDIACULT 2022), que no seu artigo 13 sinala: "subliñamos a importancia de potenciar as sinerxías entre a cultura e a educación, recoñecendo o imperativo dunha educación adaptada ao contexto, que abranga o patrimonio cultural, a historia e os coñecementos tradicionais". En segundo lugar, o novo marco para a Educación Artística e Cultural da UNESCO (Abu Zabi, febreiro 2024), asinado por España e que, a través dos seus obxectivos estratéxicos concreta os puntos anteriores, recordando que falar de educación dende as políticas culturais hoxe implica:

1. Comprender a responsabilidade educativa da cultura en ámbitos de alta polarización social. A educación debe ser intercultural, en diversidade cultural, en cidadanía mundial, para a paz e a non violencia.
2. Garantir a oportunidade pedagóxica que supón a inclusión das linguaxes artísticas na educación ao longo da vida e para todos, en diálogo coa ciencia e a tecnoloxía. (STEAM)

A LOMLOE xa incorpora a competencia artístico-cultural. Así mesmo, a área de Innovación PISA 2022 incluíu a competencia de pensamento creativo. Por último, a recente Lei de Ensinanzas artísticas aposta por unha oferta de educación e formación artística aliñada cos estándares europeos que garanta a convivencia harmónica das diferentes ensinanzas nos seus respectivos contextos e territorios.

De acordo con este marco, algunhas liñas de acción que fundamentarían os traballos dentro deste eixe serían a adecuación de lexislación e políticas, a adaptación dos ámbitos de aprendizaxe, incluíndo as experiencias de aprendizaxe con artistas, ou o desenvolvemento de alianzas entre o sector cultural e o educativo.