Diversidade étnica

En España, a diferenza doutros países europeos, a diversidade étnico-racial é un fenómeno máis ben recente. A súa distribución territorial foi desigual e atende a unha lóxica laboral e de redes. Esta cuestión non é menor, xa que os tipos de ocupación e a clase marcan a relación cos usos, a participación e o acceso á cultura.

A maior parte das persoas migrantes forman parte das capas sociais máis desfavorecidas e están relegadas a unha posición secundaria, subalterna, invisibles dentro da cultura dominante. Dende esa posición resulta difícil o acceso aos espazos sociais e culturais principais, o que impide que as súas voces sexan oídas e os seus intereses, considerados. Por outra banda, a situación das persoas etnicamente diversas non é a mesma en todos os casos, existen múltiples interseccións, connotacións e complexidades que habería que atender.

O traballo deste eixe articúlase a partir dos seguintes obxectivos:

• Realizar un diagnóstico acerca dos principais obstáculos ou barreiras que dificultan ou impiden a participación plena das persoas migrantes e racialmente diversas na vida cultural. É dicir, como a raza ou a etnia pode funcionar como un elemento de exclusión.
• Abordar o diagnóstico, xunto coas propostas resultantes, dende o punto de vista do acceso, a participación e a creación.
  • Acceso e participación na vida cultural. Dende a perspectiva das persoas etnicamente diversas establécense catro ámbitos de análise -infancia, adolescencia, idade adulta e legado vital-.
  • Creatividade e produción cultural. Analizaranse as dificultades que teñen as estruturas de produción cultural, as institucións e os equipamentos culturais para afrontar as actuais transformacións cidadás e os obstáculos que existen para acceder a esas estruturas.
• Explorar as interseccións entre as diferenzas de xénero, clase, relixión, lingua ou pertenza cultural na vida das persoas para establecer propostas específicas.
• Abordar, así mesmo, as interseccións deste eixe cos restantes eixes do Plan.