Desenvolvemento local e acción comunitaria

Este eixe presenta como obxectivo identificar, recoñecer e potenciar de forma propositiva, escalable e replicable os principais activos culturais endóxenos nunha comunidade, un barrio, unha cidade ou rexión determinada dende a perspectiva dos dereitos culturais.

Moi especialmente no ámbito local, a variable cultural preséntase como un vector transversal e transformador de primeira orde que, xunto coa capacidade de crear novos marcos e imaxinarios compartidos, axuda a configurar en termos materiais novos modos de vivir responsables e máis sostibles no ambiental, pero tamén no social e económico.

Neste contexto, aos vínculos entre cultura e educación, interculturalidade, ciencia ou tecnoloxía, engádense ao marco deste eixe outros menos explorados como novos conxuntos que configuran o trinomio entre cultura, sostibilidade e desenvolvemento local: memoria, saúde e coidados, alimentación sostible, diversidades, migracións, economía social, innovación cidadá, mobilidade e goberno colaborador, entre outros.

Polo tanto, os nexos aquí abordados debuxan un novo potencial das políticas culturais para compatibilizar entre os seus obxectivos retos tan incitantes como a participación democrática, a loita contra as desigualdades, a emerxencia climática ou a convivencia dende a diversidade.

Este eixe tamén situará un foco específico sobre o desenvolvemento de proxectos culturais baseados na acción comunitaria coa vontade de fortalecer a cohesión social a través do recoñecemento do dereito ás prácticas culturais e á participación social.

Dende esta perspectiva, o desenvolvemento cultural comunitario axudará a incorporar no Plan de Dereitos Culturais algúns obxectivos fundamentais:

• Potenciar a cultura nos barrios, vilas e cidades para promover novas centralidades que a sitúen en ámbitos máis cotiáns, faciliten o acceso e impulsen unha produción diversa e distribuída.
• Poñer á disposición da creación as infraestruturas e recursos culturais, que posibiliten o desenvolvemento de proxectos e contidos propios e adaptados en cada territorio, contando cos equipamentos de proximidade como facilitadores (centros cívicos, bibliotecas, museos, ateneos, casas de cultura, salas privadas etc.).
• Crear marcos de traballo que recoñezan, apoien e impulsen prácticas culturais comunitarias con valor público que promovan a cohesión entre territorios diversos.
• Garantir que o conxunto da cidadanía poida desenvolver as súas aptitudes e capacidades creativas e identidades culturais a través da facilitación de espazos, recursos e coñecemento.